你肯唔肯定，有人愛你？（上）
「朗仔，你喺孤兒院長大，我諗你應該冇父母嘅……經濟支援？」
我用最誠懇嘅語氣答：「雖然我冇家底，但我會努力返工，同心心一齊努力。」
「依加樓價咁貴，你做個侍應仔，要幾耐先儲到首期？」心媽冷笑一聲。
儘管心心係咁反駁，話「租樓都得」，但所有論點都被心媽一一反駁。
我第一次見女朋友嘅阿媽，就咁不歡而散。
事後，心心同我講，佢會努力勸阿媽，叫我唔駛擔心。
我相信心心，我哋深愛對方，一齊面對過好多困難，呢個問題我哋都會解決到。
正當我慨嘆緊樓價嘅昂貴，突然間，我腦裡響起一把聲。
把聲話，十日後，會有一場「地球大清洗」。
規則好簡單，到時每人可以填一個人嘅名，令嗰個人唔駛死，但無法填自己個名。
如果冇人填你個名，你就會死。
我以為我幻聽，但我一打開手機，所有人都討論緊呢件事，大家都聽到呢把聲。
而且，我哋仲可以用思想詢問詳情，知道更多細則。
例如填名嘅過程，係直接用思想填嘅，所以冇人知道你填咗邊個嘅名，絕對保密。
為避免同名嘅誤會，可以填寫盡可能多嘅身份訊息，例如身份證號碼、出生日期，確保準確性。
另外，十六歲以下兒童，以及經系統判斷冇足夠思維能力嘅人，都唔會參與呢場清洗，即係佢哋填唔到名，亦唔會死。
如果懷疑個別人士有冇資格參與清洗，亦可以通過腦部系統去詢問。
每個人都聽到，所以大部份人都相信呢件事。
咁十日內，你可唔可以搵到一個人，係你100%肯定，佢會將唯一嘅生存名額留畀你？
我自細父母雙亡，雖然長大後識咗唔少朋友，但朋友都有自己嘅親人，生死關頭，總唔可以指望朋友幫手。
好彩，我仲有最信任同最愛嘅人，心心。
「我填你，你填我？」我理所當然咁問。
心心答：「但我仲有阿媽……」
係喎，心心喺單親家庭長大，兩母女相依為命，佢當然要填埋佢阿媽。
心心馬上提出解決方法：「好簡單啫，我哋三個互填，你填我，我填我阿媽，我阿媽填你。」
聽落好完美，我終於鬆一口氣。
但我諗諗吓，愈諗愈不安。
心媽本來都嫌我冇家底，配唔起心心，咁佢會唔會假意應承，結果唔填我個名，將我剷除？
「你諗多咗，我阿媽好善良㗎。」心心咁樣答。
唉，你阿媽對你梗係善良，對我就未必㗎嘛。
我有啲糾結，我就同好兄弟大偉講起呢件事。
大偉冇答我，反而講：「我覺得，十日後，我阿爸會死。」
我嚇咗一跳：「點解？」
原來，大偉一家三口約定咗，大偉填阿媽，阿媽填阿爸，阿爸填大偉。
大偉話：「但我知道，阿媽近幾年都唔妥阿爸。」
「你阿爸做咗咩壞事？」我問。
大偉答：「咪又係去廁所唔揭起廁板，阿媽講嘢佢就眼瞓，返到屋企就掛住睇馬經咁囉。」
我覺得：「都唔係好嚴重啫，生死關頭，你阿媽唔至於想佢死嘅。」
「但我見過阿媽打小人咒阿爸。」大偉加多句。
嘩，呢個跡象嚴重啲，我馬上問：「咁你打算點做？」
「我都冇辦法，假如我填阿爸，阿媽咪死梗？假如我話畀阿爸聽呢啲嘢，阿爸一定唔填阿媽。」
大偉嘆氣：「我唯有按照約定填阿媽，希望阿媽會填阿爸啦。」
忽然，大偉話鋒一轉：「佢哋結婚三十年，阿媽都可能唔填阿爸。你真係相信，一個同你見咗一次面，而且唔鍾意你嘅未來岳母，會填你個名？」
我沉默，我忍唔住諗，呢場大清洗後，到底有幾多恩愛嘅夫妻、甜蜜嘅情侶、父慈子孝嘅家庭，撕破和諧嘅假面目？
「但即使我唔信佢，又有邊個會填我呢？」我都好無奈。
下集：https://bit.ly/3eZO646
將專頁設定為「搶先看」/ "See first"，最新故仔馬上睇！
割肉減肥：https://goo.gl/mOq2ri
睡公主的詛咒：http://bit.do/e6DFj
#短故 #短篇 #小說 #陳美濤 #廣東話 #粵語 #tomatochan #你肯唔肯定有人愛你
Search